اعمل حاجة واحدة بس ... !!
لاحظت كتير انك بتعمل كذا حاجة فى وقت واحد ؟
كتير وأنا ماشية فى الشارع بابص فى وجوه الناس بلاقيهم سرحانين مسهمين.. وهاروح بعيد ليه أنا عن نفسى بالاحظ ان دماغى كتير بتسرح فى مواقف وأفكار ومشاعر مش وقتها ولا مكانها ولا أصحابها موجودين .. واتفاجئ بعد كده انى ماشية برجلى مش بدماغى معاها.. ومش واخدة بالى من تفاصيل من تفاصيل كتير حواليا وأماكن أو ناس معايا فعلا فى اللحظة دى، وانت كمان؟ ... طيب والحل
أقولك الحل اللى عملته ونتيجته روعه.. وحسن من حياتى كتير
الحل ببساطة تدى كل حاجة وقتها... اعمل حاجة واحدة فى كل مرة
وانت بتاكل استطعم الاكل.. ركز فى تفاصيله .. فى ريحته .. فى لونه.. فى درجة حرارته .. فى امتزاج مكوانه.
وانت ماشى فى الشارع ركز فى خطواتك .. نفسك .. سرعة مشيتك .. الشارع تفاصيله..
وانت بتذاكر ركز بس فى المذاكرة .. ابعد عن الموبايل والنت.. اطفى اى مصدر للصوت جانبك سواء اغنية او موسيقى.. ممكن ده يبقى صعب فى الاول لكن مع الممارسة هتقدر .. كل ما تعمل ده اكتر هتتقنه اكتر.
ممكن تتفاجأ فى الاول انك بقيت تذاكر مدة صغيرةة وتزهق بس ركزت فيها واستجمعت عقلك كله ومع الممارسة والتكرار المدة دى هتطول وتطول
ازرع عادة جديدة ناجحة فى حياتك هتحسسك بطعم مختلف لكل حاجة
اعمل حاجة واحدة فى الوقت الواحد
اعمل حاجة واحدة كل مرة
وخليك فاكر انها مهارة تعلمها مش سهل لكن هيفيدك كتير
مع تحياتى
أسماء خليفة
تعليقات
إرسال تعليق