فزورة ... حلها وليك جايزة

من زمان قوى وأنا باحب اقرأ حدث مثل هذا اليوم، وأول ما كنت أشوف جريدة الاهرام على طول أفتح على صفحتها قبل الاخيرة واقرأ واستمتع بمعلومات وأحداث ممكن تكون جديدة عليا، ولما اندمجت فى عالم النت أكتر بقيت برده أجيب حدث فى مثل هذا اليوم من مواقع النت المختلفة زى ويكابيديا وزى النهاردة وغيرهم.

وبالعكس النت مبقاش يقيدنى بيومى اللى أنا فيه، بقيت أجيب أى تاريخ تانى زى ما أنا عايزة واقرأ يعنى مثلاً يوم 23 اغسطس، يبان كده إنه يوم عادى مفيهوش حاجة تشد لكن تعرف ان فى يوم 23 اغسطس سنة 1821 تم استقلال المكسيك عن اسبانيا، وفى سنة 1833 تم تحريم العبودية فى المستعمرات الانجليزية، 1939 وقع هتلر وستالين معاهدة عدم الاعتداء، وفى سنة 1944 ولد الكاتب محسن زايد وأحدث تانية كتير، لكن من بين كل الاحداث اللى اتكتبت على مواقع مختلفة .. فى حدث مهم جداً لم يذكره أى موقع عربى أو أجنبى فى حدث فى مثل هذا اليوم، وهو الحدث التالى:

إنه فى يوم الخميس 23 اغسطس سنة 1973 دخل لصين بنك كريديت بانكن فى السويد لسرقة البنك ولما وصلت الشرطة أخد اللصين 4 رهاين من موظفين البنك (3 سيدات ورجال) وهم: بريجيتا لاندبلاد، وايليزابيث أولد جرين، وكريستين انمارك، وسفين سافستروم).

واحتجزوهم لمدة 6 أيام إلى أن نجحت الشرطة فى القبض على اللصين وتحرير الرهائن، لغاية كده والموضوع عادى جداً ولا يستحق أن يدرج فعلا ضمن قوائم حدث فى هذا اليوم، ده بيتكرر كتير وفى بلاد مختلفة، لكن اللى هى عادى ومش طبيعى هو ان أكثر ناس دافعوا عن هذين اللصين كانوا هم الرهاين نفسهم، وقفوا قدام الشرطة والقضاء وكلوا لهم محامى للدفاع ..... هنا بقى الموضوع غريب وبدأ وقتها علماء النفس يدرسوا هذه الظاهرة الغريبة.

فى يوم 4 فبراير سنة 1974 اختطفت جماعة المسلحة الثوريين باتى هيريست ابنة أحد الأثرياء لمدة 19 شهر ولما أطلقوا سراح الفتاة برده فوجئ المجتمع ان باتى كانت متعاونة مع المختطفين جداً، ومش تعاون بس دى كمان اشتركت معاهم بعد كده فى عملية سرقة واتقبض عليها ..... غريب الموضوع شوية!!

ايه رأيكم فى فيلم الجميلة والوحش The beauty & the beast برغم اختطاف الوحش للجميلة "بل" وحبسها فى القصر وتهديدها إلا انها حبت الوحش وتعاطفت معاه ومسبتهوش خالص.

وفيلم الارهاب والكباب ... فيلم ميتنسيش طبعاً بس فاكرين قد ايه الرهاين فى الاخر اتعاطفوا مع عادل امام وشافوه طيب ومسكين ومدلوش عليه خالص برغم حبسهم وتهديدهم.

طيب هو كله خطف خطف مفيش تغيير ؟ 😂😄

لا .. فيه .. برده مشهد متكرر فى كتير من افلامنا وفى حياتنا وهو تعاطف زوجه مع زوجها وامتنانها الشديد له لانه دخلها المستشفى بعد ما كسر لها دراع او رجل او انه طبطب عليها بعد ما ضربها او اهانها.

تفتكروا ايه الرابط بين كل المواقف والاحداث اللى ذكرتها دى .طيب عرفتوا باتكلم عن ايه؟!! 🤔🤨

مع تحياتى

أسماء خليفة